ក្រុមប្រតិកម្មរហ័ស ភព ១៧ បានបើកកិច្ជប្រជុំត្រួតពិនិត្យ និងបញ្ចូលសមាជិកថ្មី ចំនួន ពីរក្រុមបន្ថែមទៀត មានសមាជិកសរុបចំនួន ៤៥ រូប នៅ ថ្ងៃពុធ ៨កើត ខែកត្តិក ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៩ ខែតុលា ឆ្នាំ២០២៥

នៅព្រឹកថ្ងៃពុធ ៨កើត ខែកត្តិក ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៩ ខែតុលា ឆ្នាំ២០២៥ មណ្ឌលសាខារាជធានីភ្នំពេញ បានបើកកិច្ចប្រជុំត្រួតពិនិត្យវឌ្ឍនភាពការងាររបស់ ក្រុមប្រតិកម្មរហ័ស ភព ១៧ ប្រចាំខែ តុលា និងរៀបចំផែនការងារទិសដៅសម្រាប់ខែ វិច្ឆកា ខាងមុខ។

កិច្ចប្រជុំដ៏សកម្មនេះ មានការដឹកនាំដោយ លោក សេង សុវណ្ណា ប្រធានសាខា និងលោក ណុប ប៊ុនហ៊រ អនុប្រធានសាខា ដែលបានអញ្ជើញចូលរួមដោយសមាជិកជាន់ខ្ពស់នៃក្រុមប្រតិកម្ម សមាជិកសាខា និងតំណាងសមាជិកក្រុមថ្មីជាច្រើនរូប។

ក្នុងឱកាសនោះ លោកប្រធាន និងលោកអនុប្រធាន បានប្រកាសទទួលស្គាល់សមាជិកថ្មីចំនួន ពីរក្រុមបន្ថែមទៀត មានសមាជិកសរុបចំនួន ៤៥ រូប ដែលបានចូលរួមជាផ្លូវការ ជាផ្នែកមួយនៃគណៈក្រុមប្រតិកម្មរហ័ស របស់ ភព ១៧ របស់គណបក្សប្រជាជនកម្ពុជា រាជធានីភ្នំពេញ។

ការបញ្ចូលសមាជិកថ្មីនេះ មានគោលបំណងសំខាន់ក្នុងការកែលម្អ និងពង្រឹងសមត្ថភាពនៃក្រុមប្រតិកម្មឲ្យកាន់តែរឹងមាំ បំពេញការងារយ៉ាងឆាប់រហ័ស និងប្រសើរឡើង ដើម្បីឆ្លើយតបទៅនឹងទិសដៅនយោបាយ និងយុទ្ធសាស្ត្រដែលគណបក្សប្រជាជនកម្ពុជាបានកំណត់។

លោក សេង សុវណ្ណា បានបញ្ជាក់ក្នុងសុន្ទរកថារបស់លោកថា ការបង្កើនកម្លាំងសមាជិកថ្មីនេះ គឺជាចម្លើយនៃការអំពាវនាវដ៏មានតម្លៃរបស់ សម្ដេចមហាបវរធិបតី ហ៊ុន សែន ប្រធានគណបក្សប្រជាជនកម្ពុជា និង សម្ដេចអគ្គមហាសេនាបតី តេជោ ហ៊ុន សែន ប្រធានគណបក្សប្រជាជនកម្ពុជា តែងតែផ្ដាំផ្ញើឲ្យសាខាទាំងអស់បន្តពង្រីកមូលដ្ឋានគាំទ្រគណបក្ស ធ្វើការយ៉ាងសកម្ម ស្មោះត្រង់ និងមានទំនួលខុសត្រូវខ្ពស់ចំពោះប្រជាពលរដ្ឋ។

លោក សេង សុវណ្ណា បានបន្ថែមថា សមាជិកគ្រប់រូបត្រូវយកចិត្តទុកដាក់ចំពោះការអនុវត្តយុទ្ធសាស្ត្ររបស់គណបក្ស ដើម្បីបង្កើតភាពជាប់ស្និទ្ធជាមួយប្រជាពលរដ្ឋ ធ្វើការងារជាប្រព័ន្ធ និងគោរពតាមវិន័យគណបក្ស ដើម្បីឲ្យក្រុមប្រតិកម្មរហ័សកាន់តែមានប្រសិទ្ធភាពក្នុងការគាំទ្រនយោបាយ និងការអភិវឌ្ឍប្រទេសជាតិ។

ក្នុងចុងបញ្ចប់នៃកិច្ចប្រជុំ លោកប្រធានបានផ្ដល់អនុសាសន៍ដ៏មានតម្លៃ ដោយរំលឹកឲ្យសមាជិកទាំងអស់បន្តរក្សា និងបណ្តុះឆន្ទៈស្មោះត្រង់ ការប្តេជ្ញាចិត្ត និងអត្តសញ្ញាណសមាជិកគណបក្សឲ្យបានជាប់ជារហូត។ ពិសេស គាត់បានផ្ដាំឲ្យអនុវត្តន៍គោលនយោបាយរបស់គណបក្សប្រជាជនកម្ពុជាឲ្យបានទូលំទូលាយ ដើម្បីចូលរួមជាផ្នែកមួយក្នុងការអភិវឌ្ឍប្រទេសជាតិឲ្យមានសន្តិភាព ស្ថិរភាព និងចម្រើនជាបន្តទៀត។

ក្រោយពេលបញ្ចប់កិច្ចប្រជុំ សមាជិកទាំងអស់បានបង្ហាញពីអំណរគុណ និងការពេញចិត្តចំពោះការដឹកនាំដ៏ប៉ិនប្រសប់របស់លោកប្រធាន និងលោកអនុប្រធាន។ សមាជិកទាំអស់គេបានសន្យាថា នឹងបន្តបំពេញកាតព្វកិច្ចគណបក្សយ៉ាងពេញទំហឹង ដើម្បីសម្រួលដល់ការអនុវត្តន៍នយោបាយរបស់សម្ដេចមហាបវរធិបតី និងសម្ដេចអគ្គមហាសេនាបតី តាមទិសដៅនយោបាយរបស់គណបក្សប្រជាជនកម្ពុជា៕