ក្រុមហ៊ុនជប៉ុនត្រូវបានលើកទឹកចិត្តឱ្យវិនិយោគលើឧស្សាហកម្មឱសថនិងម្ហូបអាហារ

ប្រធានព្រឹទ្ធសភា លោក ហ៊ុន សែន កាលពីថ្ងៃចន្ទបានលើកទឹកចិត្តឲ្យក្រុមហ៊ុនជប៉ុនស្វែងរកឱកាស ជាពិសេសក្នុងវិស័យដូចជាឱសថ និងឧស្សាហកម្មកែច្នៃម្ហូបអាហារ។

ការស្នើនេះត្រូវបានលើកឡើងក្នុងឱកាសជំនួបរវាងលោក ហ៊ុន សែន និងលោក អេឌី ពីរ៉ាត (Eddy Pirard) ប្រធាន និងជានាយកប្រតិបត្តិក្រុមហ៊ុន Japan Tobacco International (JTI) នៅព្រឹទ្ធសភា។

ជាកិច្ចស្វាគមន៍គណៈប្រតិភូដែលមកបំពេញទស្សនកិច្ចនេះ លោក ហ៊ុន សែន បានអបអរសាទរដល់ក្រុមហ៊ុន JTI ចំពោះជោគជ័យរបស់ខ្លួននៅកម្ពុជា។ លោកបានមានប្រសាសន៍ថា ក្រុមហ៊ុន JTI បានក្លាយជាក្រុមហ៊ុនគំរូនៃការអនុលោមតាមច្បាប់សារពើពន្ធ និងជាសមាជិកនៃសហគមន៍ពាណិជ្ជករល្អបំផុត។

ប្រធានព្រឹទ្ធសភា បានសរសេរនៅលើប្រព័ន្ធផ្សព្វផ្សាយសង្គមដោយបានកោតសរសើរដល់ក្រុមហ៊ុន JTI សម្រាប់ការចូលរួមយ៉ាងសកម្មរបស់ខ្លួនក្នុងការអភិវឌ្ឍន៍បៃតង និងប្រកបដោយចីរភាព និងការទប់ស្កាត់ការប្រែប្រួលអាកាសធាតុនៅក្នុងព្រះរាជាណាចក្រកម្ពុជា។

លោកបានសរសេរថា “ខ្ញុំនឹងជួបជាមួយវិស័យឯកជនបន្ថែមទៀត ដើម្បីចូលរួមចំណែកជាមួយរាជរដ្ឋាភិបាលក្នុងការអភិវឌ្ឍន៍សង្គម និងសេដ្ឋកិច្ចរបស់ប្រទេស ទោះបីជាខ្ញុំមិនមែនជាអ្នកដឹកនាំរដ្ឋាភិបាលក៏ដោយ”។

លោក ហ៊ុន សែន បានស្នើឱ្យក្រុមហ៊ុន JTI ពិនិត្យមើលលទ្ធភាព និងទាក់ទាញការវិនិយោគបន្ថែមទៀត ជាពិសេសក្នុងការធ្វើពិពិធកម្មផលិតកម្មទៅក្នុងវិស័យផ្សេងទៀតដូចជា ឧស្សាហកម្មកែច្នៃម្ហូបអាហារ និងឱសថ។

លោក ហ៊ុន សែន បានមានប្រសាសន៍ថា “ជាការពិត ក្នុងរយៈពេលប៉ុន្មានឆ្នាំចុងក្រោយនេះ កម្ពុជាបានក្លាយជាប្រទេសឈានមុខគេក្នុងការដាំដុះ និងប្រមូលផលស្រូវ និងគ្រាប់ស្វាយចន្ទីច្រើនជាងគេលើពិភពលោក”។

ចំណែកលោក ពីរ៉ាត បានមានប្រសាសន៍ថា ក្រុមហ៊ុន JTI នៅកម្ពុជា គឺជាក្រុមហ៊ុនបុត្រសម្ព័ន្ធរបស់ JT Group ដែលក្នុងនោះ ៣៣ ភាគរយជាកម្មសិទ្ធិរបស់រដ្ឋាភិបាលជប៉ុន។ លោកបានគូសបញ្ជាក់បន្ថែមថា ក្រុមហ៊ុនបានចូលរួមនៅក្នុងវិស័យផ្សេងទៀតក្រៅពីឧស្សាហកម្មថ្នាំជក់ រួមទាំងផ្នែកឱសថ និងការកែច្នៃម្ហូបអាហារ។

លោក ជ័យ តិច បានបន្តទៀតថា ទំនុកចិត្តដែលវិនិយោគិនជប៉ុន រួមជាមួយនឹងអ្នកវិនិយោគផ្សេងទៀតមាននៅកម្ពុជា គឺដោយសារសន្តិភាព បរិយាកាសនយោបាយ ហេដ្ឋារចនាសម្ព័ន្ធកាន់តែប្រសើរឡើង និងជាពិសេសគំរូជោគជ័យនៃការវិនិយោគរបស់ជប៉ុននៅក្នុងព្រះរាជាណាចក្រកម្ពុជានាពេលកន្លងមក ដូចជា ក្រុមហ៊ុន Minebea Mitsumi ដែលដើរតួជាគំរូដ៏ល្អមួយដើម្បីទាក់ទាញការវិនិយោគបន្ថែមពីប្រទេសជប៉ុន។