ក្រសួងបរិស្ថានបានប្រកាសព័ត៌មានពីម្សិលមិញថា ខេត្តបន្ទាយមានជ័យ កោះកុង និងខេត្តពោធិ៍សាត់ស្ថិតក្នុងសន្ទស្សន៍គុណភាពខ្យល់ពណ៌ទឹកក្រូចដែលមានខ្យល់ពុលកម្រិតមធ្យមក្នុងបរិយាកាសនៅក្នុងបរិយាកាស ខណៈរាជធានីភ្នំពេញ ខេត្តកណ្ដាល កំពង់ចាម កំពង់ធំ សៀមរាប ឧត្តរមានជ័យ ព្រះវិហារ ស្ទឹងត្រែង ស្វាយរៀង តាកែវ និងខេត្តព្រះសីហនុស្ថិតក្នុងសន្ទស្សន៍គុណភាពខ្យល់ពណ៌លឿងដែលមានខ្យល់ពុលកម្រិតស្រាលនៅក្នុងបរិយាកាស។
ក្រសួងបរិស្ថានបានបញ្ជាក់ថា៖ «ស្ថានភាពគុណភាពខ្យល់នៅក្នុងព្រះរាជាណាចក្រកម្ពុជាចាប់ពីម៉ោង៦ល្ងាចថ្ងៃទី១ ខែកុម្ភៈ ឆ្នាំ២០២៥ ដល់ម៉ោង៦ព្រឹកថ្ងៃទី២ ខែកុម្ភៈ ឆ្នាំ២០២៥ ដែលមានកំហាប់ភាគល្អិតនិចលគិតជាមធ្យមស្មើនឹង៦៥.៥៦µg/m3 ធៀបនឹងស្តង់ដា៥០ug/m3 និងគិតជាសន្ទស្សន៍គុណភាពខ្យល់ គឺមធ្យម»។
ក្រសួងបានរៀបរាប់ថា នៅខេត្តមណ្ឌលគីរីនិងខេត្តរតនគិរីស្ថិតក្នុងសន្ទស្សន៍គុណភាពខ្យល់ពណ៌ខៀវដែលបញ្ជាក់ថាវាគុណភាពខ្យល់ល្អណាស់។ ចំណែកខេត្តបាត់ដំបង កំពង់ឆ្នាំង កំពង់ស្ពឺ កំពត ក្រចេះ ព្រៃវែង ស្វាយរៀង កែប ប៉ៃលិន និងខេត្តត្បូងឃ្មុំមានគុណភាពខ្យល់ល្អដោយសារតែខេត្តទាំងនេះស្ថិតក្នុងសន្ទស្សន៍គុណភាពខ្យល់ពណ៌បៃតង។
ដោយឡែកខេត្តរាជធានីភ្នំពេញ ខេត្តកណ្ដាល កំពង់ចាម កំពង់ធំ សៀមរាប ឧត្តរមានជ័យ ព្រះវិហារ ស្ទឹងត្រែង ស្វាយរៀង តាកែវ និងខេត្តព្រះសីហនុស្ថិតក្នុងសន្ទស្សន៍គុណភាពខ្យល់ពណ៌លឿងដែលមានខ្យល់ពុលកម្រិតស្រាលនៅក្នុងបរិយាកាស។
ចំណែកខេត្តបន្ទាយមានជ័យ កោះកុង និងខេត្តពោធិ៍សាត់ស្ថិតក្នុងសន្ទស្សន៍គុណភាពខ្យល់ពណ៌ទឹកក្រូចដែលមានខ្យល់ពុលកម្រិតមធ្យមក្នុងបរិយាកាសនៅក្នុងបរិយាកាស។
ក្រសួងបរិស្ថានបានបែងចែកសន្ទស្សន៍គុណភាពខ្យល់ប្រាំមួយពណ៌ រួមមានពណ៌ខៀវបញ្ជាក់ពីគុណភាពខ្យល់ល្អណាស់ ពណ៌បៃតងបញ្ជាក់ពីគុណភាពខ្យល់ល្អ ពណ៌លឿងបញ្ជាក់ពីគុណភាពខ្យល់មធ្យមដែលមានខ្យល់ពុលកម្រិតស្រាល ពណ៌ទឹកក្រូចបញ្ជាក់ពីគុណភាពបង្គួរដែលមានខ្យល់ពុលកម្រិតមធ្យម ពណ៌ក្រហមបញ្ជាក់ពីគុណភាពខ្ពស់ដែលមានខ្យល់ពុលខ្លាំង និងពណ៌ស្វាយបញ្ជាក់ពីគុណភាពខ្ពស់ខ្លាំងដែលមានខ្យល់ពុលធ្ងន់ធ្ងរ។
លោក ខ្វៃ អាទិត្យា អ្នកនាំពាក្យក្រសួងបរិស្ថានមិនអាចទាក់ទងស្នើសុំការបញ្ជាក់បន្ថែមបានទេពីម្សិលមិញ។ យ៉ាងណាលោកបានប្រាប់ខ្មែរថាមស៍ពីសប្ដាហ៍មុនថា ការកើនឡើងកំហាប់សារធាតុបំពុលខ្យល់នៅក្នុងបរិយាកាស ដែលជាទូទៅពាក់ព័ន្ធនឹងការប្រែប្រួលធាតុ-អាកាស ព្រមទាំងការបញ្ចេញសារធាតុបំពុលពីប្រភពនានា ដូចជាមានការឆេះ ការដុតជញ្ជ្រាំង ភ្លើងឆេះព្រៃ ការដុតសំរាមប្លាស្ទិកផ្សេងៗ និងពីប្រភពផ្សេងៗទៀត។
លោកបានអំពាវនាវអាជ្ញាធរនិងប្រជាពលរដ្ឋចូលរួមចាត់វិធានការទប់ស្កាត់និងកាត់បន្ថយការបំពុល កាត់បន្ថយការប្រើប្រាស់ប្លាស្ទិក ទប់ស្កាត់ការដុតធូលីហុយ និងករណីឆេះផ្សេងៗ ជាពិសេសការដុតជញ្ជ្រាំង ភ្លើងឆេះព្រៃ ការដុតសំរាមប្លាស្ទិកផ្សេងៗ ដែលបង្កការបំពុលខ្យល់ក្នុងបរិយាកាស។
ជាមួយនឹងគ្នានោះ លោកបានស្នើដល់សាធារណសាធារណជនតាមដានព័ត៌មានគុណភាពខ្យល់ជាប្រចាំតាមប្រព័ន្ធផ្សព្វផ្សាយរបស់ក្រសួងបរិស្ថាន ហើយការពារសុខភាពឱ្យល្អ ប្រសិនបើមានស្ថានភាពសុខភាពខុសប្រក្រតីគួរតែពិគ្រោះជាមួយគ្រូពេទ្យនៅតាមមន្ទីរពេទ្យដែលស្ថិតនៅក្បែរកន្លែងរស់នៅ។
អង្គការមាតាធម្មជាតិកាលពីម្សិលមិញបានសម្ដែងការព្រួយបារម្ភខ្លាំងចំពោះសុខភាពសាធារណៈរបស់ពលរដ្ឋពីការប៉ះពាល់ដោយខ្យល់ពុល។
អង្គការនេះបានបញ្ជាក់ដោយយោងតាមការវាយតម្លៃរបស់ IQAir ថា កម្រិតខ្យល់ពុលនៅភ្នំពេញហក់ឡើងខ្ពស់ដល់កម្រិតប្រកាសអាសន្ន២,៥មីក្រូម៉ែត្រ (PM2.5) នៅក្នុងបរិយាកាស ប៉ុន្តែពលរដ្ឋក្នុងរាជធានីភ្នំពេញនៅតែបន្តចេញក្រៅប្រកបរបរចិញ្ចឹមជីវិតជាធម្មតា ដោយពុំបានដឹងឬព្រួយបារម្ភពីបញ្ហាផ្លូវដង្ហើមដោយសារខ្យល់ពុលនោះទេ។
អង្គការមាតាធម្មជាតិបាននិយាយថា៖ «យើងខ្ញុំអំពាវនាវទៅកាន់ប្រជាពលរដ្ឋទាំងអស់ សូមចៀសវាងការចេញក្រៅលំនៅឋាន ប្រសិនជាពុំចាំបាច់ ហើយសូមប្រជាពលរដ្ឋពាក់ម៉ាស់ពេលធ្វើដំណើរឬស្ថិតនៅក្រៅកន្លែងស្នាក់នៅ»។
ពេលបណ្ដាខេត្តមួយចំនួនទទួលរងឥទ្ធិពលខ្យល់ពុលឡើងដល់កម្រិតខ្ពស់នៅក្នុងបរិយាកាស ក្រសួងសុខាភិបាលបានចេញសេចក្តីណែនាំប្រជាពលរដ្ឋដែលស្ថិតក្នុងតំបន់ក្រហមត្រូវយកចិត្តទុកដាក់ការពារសុខភាពខ្លួននិងសមាជិកក្រុមគ្រួសារតាមរយៈកាត់បន្ថយសកម្មភាពចេញខាងក្រៅផ្ទះ ឬនៅទីវាល ហើយបិទបង្អួចបិទទ្វារ ដើម្បីបង្ការខ្យល់មិនល្អពីខាងក្រៅចូលក្នុងផ្ទះ ឬពាក់ម៉ាសក្នុងករណីចាំបាច់។
ក្រសួងសុខាភិបាលបន្ថែមថា ប្រសិនបើមានរោគសញ្ញាផ្លូវដង្ហើម ដូចជាពិបាកដកដង្ហើម ក្អក ហត់ ត្រូវប្រញាប់ទៅកាន់មណ្ឌលសុខភាព ឬមន្ទីរពេទ្យដែលនៅជិតបំផុត៕
